Ti nangato a presion ti dara ket maawagan ti "naulimek a mammapatay." Dayta ket "naulimek" ta mabalin nga addaanka iti dayta ngem saanmo nga ammo. "Mammapatay" ta dadaelenna ti bagim.
Ammom kadi a maysa iti kada tallo nga adulto ti addaan iti nangato a presion ti dara? Ken adu ti saan a makaammo iti dayta. Adu met a tattao ti mangipagarup a konkontrolenda ti presion ti darada babaen ti pildoras, ngem saanda a talaga a makonkontrol dayta.
Apay a Rumbeng a Pagtalinaedem a Kontrolado ti Presion ti Daram?
Dakkel ti tiansa a maaddaanka iti adu a problema ti salun-at no nangato ti presion ti daram. Dagitoy ti dadduma a problema:
- Istrok
- Sakit ti puso
- Panagpalia ti puso
- Sakit ti bato
- Kinabulsek.
Ania ti Normal a Presion ti Dara?
Ti normal a presion ti dara ket 120/80 wenno nababbaba. Adu a banag ti mabalin a mangapektar iti presion ti daram. Ngem no ti normal kenka ket nangatngato ngem 120/80, mabalin nga addaanka iti, wenno maaddaanka iti, nangato a presion ti dara.
Ania ti aramidek tapno mapagtalinaedko a normal ti presion ti darak?
- No agsigsigarilioka, isardengmon.
- Agbalinka nga aktibo. Padasem ti agbalin nga aktibo iti saan a nababbaba ngem 30 a minuto iti kada aldaw. Ti pannagna ti maysa kadagiti kasayaatan a pamay-an ti panagbalin nga aktibo.
- Kissayam ti asin nga ipaunegmo.
- Liklikan ti caffeine (kape, tsaa, cola).
- Mangan ti saan a kumurang ngem lima a sukat ti prutas ken nateng iti kada aldaw.
- Pagtalinaedem a kalkalainganna ti timbangmo. Damagem iti doktormo ti rumbeng a timbangmo. No masapul nga agpakuttongka, in-inutem dayta ken manganka iti umiso a taraon.
- Liklikam ti stress.
- Agtomarka iti agas. No agtomtomarka iti pildoras para iti nangato a presion ti dara, siguraduem a dika agliway.
- Makisaritaka iti doktormo tapno ad-adu ti maammuam maipapan iti posibilidad a maaddaanka iti nangato a presion ti dara.
Reperensia: OSF Saint Francis Medical Center
Bisitaen ti WebMD para iti kanayonan nga impormasion.
