Ti tinawen a panagpabakuna ket makatulong tapno maliklikan ti trangkaso. Natalged ken epektibo. Makatulong ti bakuna para iti nagduduma a kita ti influenza virus. Tulonganna ti bagim nga agpataud iti antibodies. Tumulong dagitoy nga antibodies tapno masalakniban ti bagim manipud iti impeksion.
Adu a kita ti virus ti trangkaso ken masansan nga agbaliwda.
Tinawen met a masuktan ti bakuna para kadagiti virus a tumaud depende iti panawen. Daytoy ket tapno mabaelan latta a labanan ti tallo a gagangay a kita ti virus iti dayta a tawen. Kasapulan a tinawen nga agpabakunaka tapno agtalinaedka a natalged.
Asino ti rumbeng nga agpabakuna?
Sigun iti Centers for Disease Control, dagidiay dakkel ti posibilidadda nga agtrangkaso ti rumbeng nga agpabakuna. Ramanen daytoy dagiti:
- Ubbing nga agtawen iti nababbaba ngem 5
- Adulto nga agtawen iti nangatngato ngem 65
- Masikog a babbai
- Asinoman a kimmapuy ti resistansiana wenno addaan iti agsublisubli a sakit (kas iti COPD wenno panagpalia ti puso).
Makatulong ti panagpabakuna gapu iti dua a rason:
- Panangliklik: Makatulong ti bakuna ti trangkaso tapno maliklikan ti minilion a panagpadoktor ken rinibu a pannakayospital ken ipapatay iti kada tawen babaen ti panangprotektar kadagiti pasiente ken kadagiti tattao iti aglawlawda
- Maksayan ti kinakarona: Mabalin a kissayan ti bakuna ti trangkaso ti kakaro ti trangkaso dagiti tattao a nabakunaan ngem nagsakit latta
Rumbeng nga agpabakuna uray dagiti nasalun-at a tattao
Dagiti “nasalun-at” a tattao ket posible latta nga addaan iti virus ti trangkaso. Mabalin a maiwarasda latta dayta iti dadduma uray awan ti makita a sintomas. Mabalin a mariknam a nasalun-atka. Isagana ti bakuna ti bagim a manglaban iti trangkaso. Makatulong met dayta tapno agbalin nga aktibo ti immune system-mo.
Dika mangliway iti tawen
Napateg a tinawen nga agpabakunaka. Agbaliw dagiti kita ti virus. Kumapuy ti proteksion nga ited ti bakuna iti panaglabas ti tiempo. Kayatna a sawen a posible a saannaka a malapdan nga agsakit ti bakuna idi napan a tawen.
Saannaka a pagsakiten iti trangkaso ti bakuna
Saannaka a pagtrangkasuen. No dadduma maakaala dagiti tattao iti virus sakbay pay a mabakunaanda. Mabalin nga agsakitda sakbay nga agepekto dayta (a mapan a 2 a lawas). Dayta ti rason a napateg a nasapa a mabakunaan.
Adda dagiti egg-less a bakuna ti trangkaso
Adda sabali a pagpilian para kadagiti allergic iti itlog. Damagem iti mangipapaay kenka iti panangaywan wenno iti pharmacist no maipalubos kenka ti egg-less a bakuna.
Kasano no saan a kanayon nga agepekto ti bakuna ti trangkaso?
Ti bakuna ti trangkaso ket pangsalaknib iti adu a gagangay a tumaud a virus depende iti panawen. Uray no agwaras ti nagduduma a kita ti virus, makatulong ti panagpabakuna tapno saan a nakaro ti epekto ti sakit.
Panagkunam addaankan iti trangkaso?
Mapanka iti mangipapaay kenka iti panangaywan wenno dagus a mapanka iti klinika. Mabalin a mangiresetada iti agas a pangkontra iti virus tapno maksayan ti kakaro ken kapaut ti trangkaso.
