Agtultuloy nga agbaliwbaliw ti tultulang ken susuopmo. Bayat a manaynayonan ti edadmo, mapukaw met ti kinabalanse daytoy a proseso. Posible nga agresulta dayta iti osteoporosis ken rheumatoid arthritis (RA).
Tultulang ken Osteoporosis
Iti intero a pangbiagmo, agbaliwbaliw dagiti tultulangmo. Kayatna a sawen a marunot dagiti daan a tulang. Kalpasanna, mabukel ti baro a tulang a mangsukat iti dayta. In-inut ti panagpukaw dagiti tulang bayat ti panaglakay. Ngem, pumartak dayta no ag-menopause dagiti babbai ken bassiten ti pataudenda nga estrogen.
Nalaglag-an ken narasrasi dagiti tulang nga addaan iti osteoporosis. Saan a balanse ti proseso a pannakapabaro dagiti tulang. Rumasi dagiti tulang ken dakkel ti posibilad a mabuong.
Bayat a mapukpukaw ti kinabalanse ti panagpabaro dagiti tulang gapu iti panagedad, dakdakkel ti posibilidad a maaddaan iti osteoporosis. Agtultuloy a maperdi dagiti daan a tulang. Ngem, no adda osteoporosis, manmano dagiti sumukat a baro a tulang. Agresulta dayta iti panaglag-an dagiti tulang. Gapu iti dayta rumasi dagiti tulang ken nalaklaka a matukkol.
Ti Menopause ken Osteoporosis
Mabalin a problema dagiti babbaket ti osteoporosis. Dakkel ti papel ti estrogen iti kapartak ti pannakadadael dagiti tulang. Dayta ti rason a ti osteoporosis ti kaaduan a kondision dagiti babbai a nag-menopause. Makatulong ti estrogen tapno makapataud kadagiti baro a tulang. Ngem, bayat nga agmen-menopause ti maysa a babai, bumaba ti lebel ti estrogen. Apektaran dayta ti kinabalanse dagiti selula nga agik-ikkat ken dagiti selula nga agar-aramid iti tulang. Mabalin a pakaigapuan iti nakaro a pannakadangran bayat ti kinalakay dagiti nakapuy a tulang. Dayta ti rason a napateg a maeksamen dagiti tulang no agtawenen iti 50.
Panangrukod iti Linaon ti Tulang a Mineral
Mairekomendar kadagiti babbai a nalpasen a nagmenopause nga ipaeksamenda ti tulangda no agtawendan iti nasurok a 50. Ti kangrunaan nga eksamenasion para iti osteoporosis ket ti panangrukod iti linaon ti tulang a mineral. Ti linaon ti tulang a mineral ket ti kaadu ti mineral ti tulang, kas iti calcium, nga adda iti tulangmo. No nababa ti mineral iti tulangmo kayatna a sawen nga adu dagiti abutna, wenno kawaw. Mabalin nga eksamenen ti doktormo ti mineral a linaon ti tulangmo. Mabalin met ng ibaonnaka iti sabali a lokasion para iti eksamenasion. Depende iti pagnanaedam, mabalin a tumulong ti planom iti salun-at tapno mayurnos ti eksamenasion iti balaymo.
Ti Aramidem no Addaanka iti Rheumatoid Arthritis
Iti damo, maballin a narigat a maammuan no kasano a tamingen ti RA.
Ngem makatulong no maawatam ti pannakadayagnosmo tapno makontrolmo ti salun-atmo. Awan ti agas ti RA. Ngem, adu ti pagpilian a panagagas ti makatulong kenka a mangibtur iti ut-ot ket agtalinaed nga aktibo. Makisaritaka iti doktormo. Ammuem ti maipapan kadagitoy a panagagas.
Napateg a rugian a dagus ti panagagas kalpasan a madayagnoska. Makatulong dayta tapno malapdan ti agpaut a pannakadadael dagiti susuopmo ket sumayaat ti salun-atmo.
No Kasano a Puntiriaen ti Rheumatoid Arthritis Dagiti Susuop
Iti kaaduanna kaso, ti RA ket agpaut a kondision. Paglettegenna dagiti susuop. Agresulta dayta iti ut-ot ken kinasikkil. Mabalin a mangparigat dayta nga agkuti wenno mangileppas kadagiti inaldaw nga ar-aramiden.
Tunggal susuop iti bagi ket ti pagsabatan ti murdong ti dua a tulang. Dagiti cartilage ti mamagsilpo kadagiti tulang ken ti synovium ti mangkalupkop iti susuop. Daytoy a kita ti tisyu ti tumulong iti tulang a silalamuyot nga aggaraw iti susuop.
No addaanka iti RA, lumteg ken pumuskol ti synovium. Dayta ti mangdadael iti cartilage ken tulang. Pakapuyenna met dagiti masel nga adda iti aglawlawna. Pakapuyenna met dagiti tendon a mamagsilpo kadagiti masel iti tulang. Gapu iti dayta a narigat ti aggaraw. Iti dadduma a kaso, makillo dagiti susuop gapu iti nakaro a panagletteg.
Gagangay nga apektaran ti RA dagiti babassit a susuop iti ima ken saka iti agsumbangir a paset ti bagi. Ngem mabalin nga apektaranna ti adu a susuop, kas iti:
- Lipaylipay
- Siko
- Patong
- Tumeng
- Tengnged
- Abaga
- Pungngopungnguan
Gagangay a Panagagas
Dagiti kasapulan no madayagnos ti RA:
- Pisikal nga eksamenasion,
- Posible nge eksamenasion ti dara
- Eksamenasion kas iti X-rays, MRI wenno ultrasound
No madayagnoska, panggep ti panagagas ti RA nga:
- Panagletteg iti baba
- Maep-ep dagiti sintomas kas iti ut-ot ken panagletteg
- Panangliklik iti agpaut a pannadadael dagiti susuop
Awan ti maymaysa a panagagas nga epektibo iti amin a pasiente. Mabalin a baliwan ti adu a tattao ti panagagasda iti maminsan wenno ad-adu pay. Ti mangbalbaliw iti sakit nga agas ti rayuma (DMARD) ket gagangay isu ti umuna a maireseta para iti RA.
Adu ti mabalin nga aramiden dagiti tattao nga addaan iti RA tapno matamingda dayta. Mabalin a maaddaan iti nasayaat a panagbiag dagiti adaan iti RA. Ngem, no addaanka iti RA masapul nga adda aramidem iti dayta. Napateg a tomarem ti amin a maireseta nga agas. Napateg met a labanam ken ibagam ti maipapan iti dayta. Ibagam iti doktormo no dagiti agas ket mangted iti aniaman a side effect wenno problema.
Narigat ti aggaraw ken lumteg dagiti susuopmo no nalam-ek ken nalamiis ti tiempo.
Nakapatpateg a nasalun-at ti tulang, aglalo iti kinamataengan. Dadaelen ti osteoporosis dagiti tulang. Nupay gagangay ti osteoporosis, mabalin a maliklikan dayta.
